ثاني سشن

خيبة أمل كبيره بعد السشن الأول ،،
لأننا في الحقيفه صدمنا ،، بعد أن كنا نتفاخر بأن كليتنا خاليه من هذا النوع من الدكاتره ... ، وأن عهد التهزيء والتحطيم قد إنقضى بمجرد إنتهائنا من كورس العلوم صحية (في كلية العلوم) ، هاتحن نرى تلك العدوى بدأت تنتشر لتصيب دكاترة كليتنا
يمكن تكون بس آثار الصدمه هي اللي خلتنا نحس بهالشعور ، ويمكن نكون ظلمنا كليتنا وظلمنا ذاك الدكتور ؟؟! ،.... اتمنى ذلك
بعد السشن الأول بيومين حان موعد السشن الثاني ،، وكان الموعد ظهراً ،،
حضرنا ونحن قلقين ومترددين ، صحيح الدكتور غير الأول ، لكن نخاف يكون مثل الأول ، أو أسوأ ،،،

تجمعنا في الموعد المطلوب ،،
طلبنا الدكتور بالبيجر (أعطيناه بلب) => صرنا خبره بعد السشن الأول ونعرف وش نسوي :)
لم يجيب !!
ننتظر اتصاله ،،
ولا أي خبر !!

انتظرناه فتره ،،

طفح الكيل ،

لازم ناخذ سشن اليوم يعني لازم

،،،

ذهب قلب الأسد لسكرتيرة القسم (موظفه فلبينيه هي المنسقة فيما بين الطلاب والدكاتره ، وتنظيم القسم قائم على الله ثم عليهم ، في النظري والعلمي ، وهي اللي توزع الدكاتره على المجموعات و و و مهام لاتعد ولاتحصى ، صراحه ماقصرت وكلنا مقدرين تعبها وجهودها لأنها تقوم لوحده بمهام كثيره .. ونتيجة ضغط الشغل عندها دائماً تصير لخبطه في التوزيع والمحاضرات ، والضحيه – أكيد الطلاب ....)

قال لها قلب الأسد:
الدكتور عطيناه بلب ، ومايرد => فهمت عليه الفلبينيه ;)
مين دوكتور
فلان الفلاني
جست ويت أمينت => انتظر دقيقه
.
.
.
بعد أن حاولت تتصل على كل أرقامه الموجوده عندها لكن بدون أي رد ،،، وحاولت البحث عن أحد الدكاتره المتفرغين ليعطينا السشن لكن لم تجد ،،،
قالت بأن اليوم بيتقسم قروبنا لمجموعتين من خمس طلاب وكل مجموعه تنظم مع إحدى المجموعات الأخرى =

رفضنا ، لكن تعذرت بعدم وجود وقت كافي ، وأنه لو انتظرنا استدعاء دكتور آخر فإن وقت السشن سينتهي بدون أن نستفيد ،،،

وافقنا وأمرنا لله ،،، وقسمنا أنفسنا لمجوعتين
أنا ومعي 4 من قروبي ، ذهبنا لنبحث عن المجموعه التي سننضم إليها ،،

وجدناهم في الجناح .. ،،
سألناهم وين دكتورهم ؟؟، قالوا بأنه أرسل سكرتيرته الخاصه ، وحدد لهم مريض ليأخذوا التاريخ المرضي لحالته ،، وسيأتي هو بعد ساعه ليطّلع على اللي عملوا ،،

اتجهنا للغرفة المحدده بها المريض ،

عند باب الغرفة ، وقفنا جميعا ( 15 طالب ) ،،،
كنا خائفين من تلك التجربه لأول مره ، ومع أننا كنا قد أخذنا محاضرات كثيره في كيفية أخذ التاريخ المرضي وحفظنا الطريقه مثل أسمائنا (نظرياً) ، إلا أنه عندما جاء وقت التطبيق إختلف الوضع ، كل طالب يحاول التهرب ، ويقدم غيره ،،، مافيه أحد يبغى ياخذ التاريخ المرضي (الهستوري) من المريض !!

في النهايه ، اتفقنا على أن يقوم طالبين (من الشجعان :) ) بأخذ الهستوري من المريض ، والبقيه سيكونون متفرجين فقط ، ولايتكلمون حتى لانزعج المرضى ،،،


استأذننا ،،
دخلنا الغرفه ،، وكان شكلنا مرعباً ،،،
جيش من 15 رجلاً يرتدون المعاطف البيضاء !! ،
شي يخوف بالنسبة للمرضى ،،،، لكن في الحقيقه ، من يلقي نظره على وجوه أفراد (جيش الـ15) يضحك ويرحمهم ، من الارتباك والخوف البادي عليهم ،،،

كان في الغرفه مريضين
الأول كبير في السن ومعه ابنه مرافق ، والثاني في الخمسينات تقريبا

اتجهنا للمريض الذي في يمين الغرفه ،
السلام عليكم
ياعم ، لو تسمح ، نبي نسألك بعض الأسئله => بتردد وخوف

كان المريض تعبان ، والظاهر يوم شاف جيشنا خاف، بيقول: ماتجمعوا إلا أكيد فيني بلا !!!
تفضلوا
شكراً

وبدأ الطالبان في طرح أسئلتهم ،،،،،

لكن المشكله ، أننا نسينا أسئلة التاريخ المرضي ، مع أننا كنا حافظينها ومراجعينها !!!

بمجرد أن بدأوا بأول الأسئله ،،، توقفوا ،،،
وأخذوا ينظرون لوجوه بعضهم البعض !!
كل واحد ينظر الإنقاذ يجيه من أخوياه :)
ماأحد فاد أحد ،،،

كانت في أيدينا الكتب والمذكرات الخاصه بكيفية أخذ التاريخ المرضي ،،،
البعض فتحها عشان يتذكر ،،،

لقطنا بعض الأسئله ،،، وبدأت الأوضاع تستقر ،،

تجرأ الطلاب ،،

كل واحد صار يسأل من عنده !!!

وين راح إتفاقنا إنه مايتكلم إلا طالبين بسس !

يمكن من الفرحه والحماس نسوا أنفسهم (ومنهم أنا :) )

المريض محيطين به 15 طالب ، والأسئله مثل الصواريخ ، من كل جهه سؤال ،،

ومن المضحك ، أن البعض ، يسأل أسئله ، كان زملائه قد سئلوها للمريض قبله ، لكن كل واحد مايدري عن غيره ،،

فتره من الفوضى ،،،، فوضى هادفه :)

صراحه المريض حالته مقعده على طلاب في مستوانا

وهنا ،،، تنبه أحد الطلاب للخطأ !!!

الدكتور طلب مننا نروح للمريض في السرير (أ) ، لكن هذا المريض اللي قاعدين ناخذ منه الهستوري في سرير (ب) !!!


أفااااااااا :(

مشكله ،،،

ماعاد باقي وقت ،،،

أخذ الطالب (الصاحي :) ) يبلغ باقي الشباب بصوت منخفض ، عشان مايسمعنا المريض ..

وبعد أن صدمنا بذلك

طلعنا من الغرفه ،،،

إجتماع عاجل في الممر أما الغرفه

يعني مافيه أحد فينا صاحي !!! ورا مااحد منكم انتبه لرقم السرير


معليش

أهم شي إننا ماأخطينا في رقم الغرفه => نرفع المعنويات

طيب وش الحل ، نكمل مع مريضنا الأول ، ونقول للدكتور
ولا نروح للمريض الجديد ؟؟!

المشكله إننا ماندري عن الدكتور ، يمكن يكون معقد ويقول ماأبغى إلا المريض اللي أنا حددته !
وبعدين مافيه وقت ,,,

لقينا الحل ،،،
يروح طالبين للمريض القديم (اللي سبق وبدأنا معه) ، يتكلمون معاه ويسألونه كم سؤال ، وبعدها يصرفونه بأسلوب حلو => ياحبنا للمجاملات :)

والباقي يروحون للمريض الجديد ،،،
ونحاول نراقب الدكتور ، متى يجي ، عشان مانتأخر عليه

دخلنا على الجديد ،،،،
سألناه ، وكان المستوى قد تحسن ، وراح الارتباك ،،،
لكن لازالت مشكلتنا مثل الأول ( مافيه تنظيم ، والاسئله تجي المريض من كل جانب ... )

شوي وخلصنا ،،،،

ذهبنا للاستراحه في الجناح ،،،

جلسنا على الكراسي ، ننتظر الدكتور ، ونحاول صياغة التقرير عن حالة المريض ،،،

انتظرنا


أرسلنا نسأل السكرتيره ،،،

طيب الدكتور شوي وجايكم

انتظرنا


طفشنا


أخيراً جانا دكتور ثاني (من جنسية عربيه)

يقول الدكتور فلان أرسلني لكم ، وهو مابيجيكم اليوم مشغول

مشغول !!!!!!!!!!!!!

عساه اللي (منيب قايل) ، دامه مشغول ووقته مايسمح ، ليش يطلب يخلي القسم يكلفه بتدريس الطلاب ، => هذا الكلام كان يدور في عقلي الباطن


خلاص وش نسوي ،،، الشكوى لله

جلس معنا الدكتور الجديد

سألنا ،،،
إنتوا عاوزين أشرحلكو إيه
وش يدرينا عنك ،، أنت الدكتور ولا إحنا !! :)
طيب إنتوا سنه كام
!! سنه ثالث !!!
أيوه ،،، عاوزين أديلكو عن الهستوري !!
اللي تشوفه
طيب ،، الهستوري دا حاقه مهمه في تشخيص المريض ، و و و و ،،، كلام مكرر ، ومايضيف لنا أي شي

يادكتور ، حنا أخذنا هستوري من مريض ، تبي نقراه عليك وأنت توضح لنا الأخطاء ؟
كويس

ويبدأ أحد الشباب بتقديم التقرير ...
انتهى

دا كويييس ، ممتاز
مافيه ملاحظات عليه ؟
لأ ... => الظاهر يبي الفكه منا

طيب يادكتور ، خلصنا
أيوه
أجل وقع لنا على كشف الغياب

وقع لنا ،،،

انتهى السشن

ذهبنا لمنازلنا ...

وقد إطلعنا على صوره أخرى من الدكاتره ،،،،
لكن عزانا الوحيد ، والفائده الوحيده في ذلك اليوم ،،، هو الدخول على المرضى ، وكيفية التعامل معهم

......